Dünyanın əksəriyyət ölkələrində qeydə alınmış koronavirus öz coğrafiyasını durmadan genişləndirməkdədir. Bu virus insanların sağlamlığına ciddi təhdid yaratmaqla yanaşı, dünya iqtisadiyyatını da böyük bir təhlükəyə sürükləməkdədir.

Lakin bütün dünyada həyəcana səbəb olan koronavirusla bağlı hazırda Azərbaycanda digər ölkələrdən fərqli olaraq həll olunmayacaq problemlər müşahidə olunmur. Koronavirus infeksiyası ilə bağlı vəziyyət dövlət başçısının ciddi nəzarəti altındadır. Dövlət səviyyəsində koronavirusun Azərbaycanda daha geniş yayılmaması, əhalinin sağlamlığının mühafizəsi ilə bağlı bütün lazımi addımlar atılır, ən yüksək səviyyədə qabaqlayıcı tədbirlər görülür. Azərbaycan Respublikası Nazirlər Kabineti yanında Operativ müşavirələrində təcili, təxirəsalınmaz və icrası məcburi olan bir sıra qərarlar qəbul edilir. Respublika Prezitenti cənab İlham Əliyevin təşəbbüsü ilə Koronavirusla Mübarizəyə Dəstək Fondunun yaradılması, I vitse-prezident Mehriban Əliyevanın xalqa çağırışlar etməsi, Heydər Əliyev Fondu tərəfindən həyata keçirilən işlər buna bariz nümunədir.
Əlavə olaraq, bütün dövlət orqanları, əlaqədar təşkilatlar, mütəxəssislər vahid məqsədə köklənmiş və xalqın sağlamlığının keşiyinə səfərbər edilmişdir. Bu məqsədlə Azərbaycan Dövlət Pedaqoji Universitetinin (ADPU) Şamaxı filialı tərəfindən ölkədə elan olunmuş xüsusi karantin rejimində aztəminatlı ailələrə, yaşı 65-dən yuxarı tənha yaşayan şəxslərə, əlilliyi olan uşaqların ailələrinə, şəhid ailəsi üzvlərinə və digər həssas kateqoriyadan olan insanlara dəstək məqsədilə sosial aksiya keçirilmişdir. Aksiya çərçivəsində filialın yerləşdiyi Şəhriyar qəsəbəsində yaşayan, bu qəbildən olan 24 ailəyə ərzaq məhsullarından ibarət sovqatlar paylanıldı, 2 ailəyə isə maddi yardım olundu .
Rubrika.Az xəbər verir ki, aksiyada filialın direktoru, dosent Tünzalə Yusifova,Tədris və elmi işlər üzrə direktor müavini Şasəddin Mikayılov, Tərbiyə işləri üzrə direktor müavini Şəlalə Seyidova,Həmkarlar İttifaqı Komitəsinin sədri Çingiz Dadaşov,filialın əməkdaşı Sevda Pur-Rza və digər əməkdaşları Şamaxı filialının kollektivi tərəfindən hazırlanan sovqatları ailələrə paylamışlar.
Ailələrə görüşlərdə filialın direktoru Tünzalə Yusifova son günlər dövlət başçısının xalqın rifahı naminə atdığı addımlardan, həmçinin Şamaxı rayon İcra Hakimiyyətinin keçirdiyi sosial layihələrdən bəhs etdi. Vurğulandı ki, filial tərəfindən həyata keçirilən işlər də məhz dövlət başçısının vətəndaşlara qayğısının nəticəsidir.
Aksiya müddətində duyğu dolu anlar yaşanmış, yardım olunan bütün ailələr karantin dövründə dövlətin həyata keçirdiyi bütün sosial islahatlardan, aztəminatlı ailələrə 190 manat məbləğində birdəfəlik ödənişin edilməsi təşəbbüsündən razılıqlarını bildirdilər, həmçinin ADPU-nun Şamaxı filialı tərəfindən keçirilən bu xeyirxah əməldə əziyyəti olan hər kəsə minnətdarlıqlarını ifadə etdilər.








Rubrika.Az

Facebook-da paylaş