Ermənistan Baş naziri Nikol Paşinyan Təhlükəsizlik Şurasının iclasında Azərbaycan və Türkiyə ilə münasibətləri yaxşılaşdırmaq lazım olduğunu bildirib. Müşahidəçilər Paşinyanın sözlərini Türkiyə Prezidenti Rəcəb Tayyib Ərdoğanın "altılıq platforması”nda Ermənistanın da iştirakının mümkünlüyü ilə bağlı dediklərinə cavab hesab edir. Rəsmi Bakı da Ermənistanla münasibətlərin yaxşılaşdırılmasına müsbət baxır və Ərdoğanın təklifini dəstəklədiyini açıqlayıb. Azərbaycan Prezidenti İlham Əliyev Ermənistanın "altılıq platforması”nda iştirakını Qarabağ ətrafında yeni müharibədən sonrakı reallıqları tanıması ilə əlaqələndirib.

Maraqlıdır ki, Ermənistan müxalifəti və mediası baş nazirdən fərqli olaraq münasibətlərin qurulmasına isti yanaşmır. Erməni siyasətçilərin əksəriyyəti 44 günlük döyüşlərdə yaşadıqları məğlubiyyətin revanşını almaq hissi ilə yaşayaraq, Qarabağda yaşayan ermənilərin müstəqil dövlət olmasına çalışacaqlarını bildirirlər. Azərbaycanın şərti isə budur ki, İrəvan qonşu ölkələrə qarşı ərazi iddialarından əl çəkməlidir.

Maraqlıdır ki, Ermənistan mediası da siyasətçilər kimi Ərdoğanın Bakıda səsləndirdiyi təklifi geniş müzakirə etməyib. Əksinə, Ermənistanın yeni İqtisadiyyat naziri Vaan Kerobyanın Azərbaycanla iqtisadi əlaqələrlə ölkə iqtisadiyyatının bərpası perspektivinə dair fikirlərini sərt tənqid edirlər. Erməni nazirin sözlərinə görə, sərhədlərin açılması Ermənistanın iqtisadi vəziyyətinə müsbət təsir göstərəcək və onun məhsullarının dünya bazarına çıxarılmasına kömək edəcək. O, Türkiyə limanlarından istifadəni və Azərbaycanla birgə bazar biznesini mümkün hesab edir.

Müşahidələr göstərir ki, yaxın zamanlarda Azərbaycan-Ermənistan arasında iqtisadi əlaqələr qurulmayacaq. Çünki hər iki ölkənin rəhbərlərindən fərqli olaraq, geniş ictimaiyyət əlaqələrin qurulmasına hazır deyil.

Bununla belə, 10 noyabrda imzalanan üçtərəfli bəyanatda ölkələr arasında iqtisadi əməkdaşlığı inkişaf etdirmək məsələsi əksini tapıb. Burada nəqliyyat, kommunikasiya və əlaqələrin bərpası nəzərdə tutulur.

İqtisadi əlaqələrin bərpası Ermənistan iqtisadiyyatını xilas edə bilərmi?

Ekspertlər hesab edir ki, Azərbaycandan fərqli olaraq Ermənistan iqtisadiyyatının indiki strukturu iqtisadi əlaqələrdən maksimum yararlanmağa imkan vermir. Çünki Ermənistanın Rusiya başda olmaqla MDB ölkələrinə ixrac etdiyi məhsullar Azərbaycan bazarında güclü rəqabətlə üzləşməli olacaq. Ermənistanın ixrac etdiyi məhsullar - siqaret, konyak, kənd təsərrüfatı məhsulları, geyim, ayaqqabı və s. - Azərbaycan bazarında digər ölkələrdən böyük həcmdə idxal olunur. Üstəlik sadalanan məhsulların əksəriyyəti həm də Azərbaycanda istehsal da olunur. Başqa tərəfdən isə 100 ildən çox müddətdə davam edən erməni düşmənçiliyi səbəbindən Azərbaycan ictimaiyyətində hələ uzun zaman erməni mallarına münasibət mənfi olaraq qalacaq.

Azərbaycandan fərqli olaraq Ermənistanda Azərbaycan məhsullarına böyük tələbat var. Mediada yayılan məlumatlardan görünür ki, Azərbaycan şirkətlərinin istehsalı olan məhsullar Ermənistanda satılır. Bu məhsullar Gürcüstandan alınaraq, Ermənistana aparılır. Üstəlik, Azərbaycanın istehsal etdiyi neft məhsulları da Ermənistan bazarında rəqabətlə üzləşməyəcək.

Mütəxəssislər hesab edir ki, Türkiyə və Azərbaycanla iqtisadi əlaqələr onsuz da zəif potensiala malik olan Ermənistan iqtisadiyyatının bir neçə sahəsini əhəmiyyətli dərəcədə zəiflədəcək. Belə ki, regional əmək bazarınının üstünlüyü prinsipləri bu əlaqələrdə də keçərli olacaq.

Bununla belə istənilən halda Ermənistanın qonşu ölkələrlə əlaqələrin bərpası bu ölkəninin yeganə xilas yoludur. Paşinyan bunu başa düşən və dilə gətirən yeganə siyasətçi kimi görünsə də, zamanla Ermənistanın siyasi elitasının bu reallığı qəbul edəcəyi şübhəsizdir...(qaynarinfo)

RUBRİKA.AZ

Facebook-da paylaş