““Azərtelefilm” Yaracılıq Birliyinin ləğv edilməsi ictimaiyyət arasında geniş müzakirəyə səbəb olan məsələlərdəndir. “Azərtelefilm”də struktur belə qurulmuşdu ki, maliyyə və kadr potensialı tam müstəqil şəkildə idarə olunurdu”.

Rubrika.Az xəbər verir ki, bunu “Azərbaycan Televiziya və Radio Verilişləri” Qapalı Səhmdar Cəmiyyətinin sədri Rövşən Məmmədov onlayn keçirdiyi illik mətbuat konfransında bildirib.
R.Məmmədov qeyd edib ki, “Azərtelefilm”in qurulan strukturu qurum daxilində qurum təsiri bağışlayırdı:
“Sədr olmağımıza baxmayaraq, biz “Azərtelefilm”in sırf maliyyə xərcləri, kadrların işə cəlb olunması və işdən azad edilməsi prosesinə tam nəzarət edə bilmirdik. Bunun ləğv edilməsinin yalnız bir məqsədi olub: Şəffaflıq. Biz maliyyəni bir maliyyə idarəsinə, kadrları isə bir kadrlar departamentinə birləşdirdik. Bunu ona görə etdik ki, ən azından bu bizim tərkib hissəmizdirsə, qurumumuzdursa, ordan ayrılan vəsaitin hara getdiyini, necə xərclədiyini və necə istifadə olunduğunu da bilək. Yəni buna nəzarət etmək üçün bu addım atıldı. Eyni zamanda, kadr məsələsi. Biz dəfələrlə araşdırmalar zamanı şahid oldu ki, kadrlarla müəyyən müqavilələr imzalanıb. Düzdür, həmin kadrlara ödənişlər edilmir, amma o kadrlar bizim balansımızda qalır. Bu təmizləndi. İl ərzində, hətta, deyərdim ki, ay ərzində müəyyən vəsait xərclənib, burda az miqdarda vəsaitdən söhbət getmir. Amma həmin o vəsaitə uyğun ortaya filmlər qoyulmayıb. O zaman sual yaranır ki, bu vəsait hara xərclənib? Necə xərclənib? Məhz bu proseslərə nəzarət etmək üçün həmin qurum tam olaraq AzTv-yə birləşdirildi. Məqsəd bundan ibarət idi”.
“Azərtelefilm”in ləğvindən sonra yaradılan bədii-sənədli filmlər studiyası barədə danışan sədr ikisi arasındakı fərqlərə də nəzər salıb:
“İki il ərzində 50 sənədli, 14 bədii televiziya filmi çəkilib, istehsal olunub və ictimaiyyətə təqdim edilib. Bu 2 ili həmin əvvəlki dövrlərlə müqayisə edin. Əgər görsəniz ki, əvvəlki dövrlərdə film sayı bundan artıq olub, onda bizə müraciət edin. Lakin əksinə, görəcəksiniz ki, 2 il ərzində telefilmin məhsuldarlığı daha çox olub. Məhz bu zərurətlərdən irəli gələrək bu addımları atdıq. Amma əlbəttə ki, telefilmdə əməkdaşlar çalışır və onların keyfiyyətli filmlər çəkməsi üçün hər cür şərait yaratmışıq. Onlar layihələr təklif edirlər, biz də baxıb qiymətləndiririk. Əvvəl telefilmin rəhbəri baxırdı və müəyyən qərar verirdi, amma indi bütün televiziya kollektivi, istər müavinlər, istər sədr olaraq mən, baxırıq, təhlil edirik ki, bu film bizə lazımdır, yoxsa yox. Əvvəl portret filmlər çəkilirdi, əlbəttə, bu da lazımdır, amma müasir dövrdə portret filmlər nə dərəcədə aktualdır və baxımlıdır? Etiraf edək ki, o qədər də baxımlı deyil. Ona görə də biz daha çox tarixi filmlərə üstünlük veririk”.
Qeyd edək ki, “Azərtelefilmin” direktoru Əməkdar incəsənət xadimi, Azərbaycanın Xalq artisti, tanınmış teatr, kino və televiziya rejissoru Ramiz Həsənoğlu idi.(“BakuPost” )

Rubrika.Az

Facebook-da paylaş