Azərbaycanın mikromaliyyə sektoru 2-ci Qarabğağ müharibəsində şəhidlərinin ailələrinə, qazilərə və müharibədən zərər çəkən digər şəxslərə kredit güzəştlərinə başlayıb.

Bu barədə Azərbaycan Mikromaliyyə Assosiasiyasından (AMFA) bildirilib.

«44 günlük 2-ci Qarabağ müharibəsində Azərbaycanın şanlı ordusu vətənimizin ayrılmaz tarixi parçası, qədim və zəngin mədəniyyətimizin sönməz ocağı Qarabağımızı düşmən tapdağından azad etdi. Bu qələbəyə görə şəhidlərimizə və qazilərimizə borcluyuq və onların ailələrinin sosial problemlərinin həll edilməsinə hər birimiz töhfəmizi verməliyik»-deyə AMFA-dan bildirilib.
Təşkilatdan bildirilib ki, Azərbaycan Prezidentinin tapşırığı ilə torpaqların azad edilməsi uğrunda döyüşlərdə şəhid olmuş hərbiçilərin banklara olan istehlak kreditləri və onlara hesablanmış faizlər və digər ödəmələrin tam həcmdə silinməsi, düşmən təxribatı nəticəsində həyatını itirmiş mülki vətəndaşlarımızın banklara olan istehlak kreditləri və onlara hesablanmış faizlər və digər ödəmələr tam həcmdə silinməsi qərarı verilib.

Hərbiçilərin və düşmən təxribatı nəticəsində zərər dəymiş vətəndaşların dəstəklənməsi məqsədilə AMFA üzvləri (BOKT-lar) yekdil olaraq müəyyən qərarlar qəbul edib. Aşağıda adı çəkilən BOKT-lar göstərilən 3 kateqoriya üzrə müharibə iştirakçısı və ya müharibədən zərər çəkmişlərin borclarının silinməsinə dəstək veriblər:

1) 2-ci Qarabağ müharibəsi şəhidləri və onların birinci səviyyəli ailə üzvləri (ata, ana, yoldaş, övlad); buraya eyni zamanda fiziki imkanlarını itirmiş qazilərimiz və onların birinci səviyyəli ailə üzvləri daxildir.

2) Müharibə zamanı raket hücumu nəticəsində evinə və biznesinə zərər dəymiş (Gəncə, Tər-Tər, Bərdə, vəs) müştərilər.

3) Müharibədə iştirak etmiş və müharibə zamanı xəsarət alan 1-ci səviyyəli müştərilər və onların ailə üzvləri borc üzrə faiz ödəməkdən azad olacaq.

Azərbaycanın mikromaliyyə təşkilatları – BOKT-lar tətəfindən şəhid və qazi ailələri, eləcə də vətəndaşlara aşağıdakı dəstək verilib:

1) «Viator Mikrokredit Azərbaycan» BOKT – 12 şəhid müştərinin 13 613 AZN kredit borcu silinmiş, evinə və ya biznesinə zərər dəymiş 3 müştəri 5 016 AZN kredit faizi ödəməkdən azad edilmiş, müharibədə iştirak etmiş və ya xəsarət alan birinci səviyyəli 9 müştəri isə 4 224 AZN olmaqla borc üzrə faiz ödəməkdən azad edilmişdir;

2) «KredAqro» BOKT - 3 şəhid müştərinin 4 237 AZN kredit borcu silinmiş, evinə və ya biznesinə zərər dəymiş 66 müştəri 174 822 AZN kredit faizi ödəməkdən azad edilmişdir

3) «İdeal Kredit» MMC BOKT - 2 şəhid müştərinin 343,58 AZN kredit borcu silinmiş, müharibədə iştirak etmiş və ya xəsarət alan birinci səviyyəli 4 müştəri isə 16,746 AZN olmaqla borc üzrə faiz ödəməkdən azad edilmişdir;

4) «Qafqaz-Kredit» MMC BOKT - 1 şəhid müştərinin 3 741 AZN olmaqla borcu silinmiş, müharibədə iştirak etmiş və ya xəsarət alan birinci səviyyəli 1 müştəri isə 398 AZN olmaqla borc üzrə faiz ödəməkdən azad edilmişdir;

5) «Avrasiya Kredit» BOKT - 4 şəhid ailəsinin 8 288 AZN kredit borcu silinmiş, 7 fiziki imkanını itirmiş qazimizin 1 217 AZN borcu silinmişdir;

6) «İnkişaf üçün Maliyyə» BOKT - 20 şəhid ailəsinin 37 052 AZN kredit borcu silinmişdir.

7) «Aqrarkredit» QSC BOKT - 5 şəhid ailəsinin 40 903AZN kredit borcu silinmişdir.

8) «FİNCA-Azərbaycan» BOKT 5 şəhid ailəsinin 10 661 AZN kredit borcu silinmişdir.

9) «FİNOKO» BOKT - 8 şəhidin 17 265 AZN kredit borcu silinmiş, 4 fiziki imkanını itirmiş qazimizin 5 216 AZN borcu silinmişdir.

Rubrika.Az

Facebook-da paylaş