Ermənistanda hakim siyasi qüvvə ilə bu günədək İrəvan meri olmuş Ayk Marutyan arasında qarşıdurma davam edir. Son xəbərlərə görə, artıq Marutyan istefaya göndərilib.

“AzPolitika.info” Ermənistan mətbuatına istinadla xəbər verir ki, hakim “Vətəndaş müqaviləsi” partiyası İrəvan merinə qarşı impiçment prosedurunu yekunlaşdırıb. Belə ki, bu gün şəhər şurasında merin istefaya göndərilməsi məsələsi qoyulub və səsvermənin nəticəsinə görə Marutyan vəzifəsindən azad olunub. Onun yerinə müavini Qraçya Sarkisyan seçilib (44 səs lehinə, 10 səs əleyhinə). Bu ərəfədə isə Marutyanla hakimiyyət rəsmiləri arasında sözlü atışmalar davam edib. Qeyd edək ki, Marutyanın istefaya göndərilməsi məsələsi hələ 2020-ci ilin noyabrından başlayaraq gündəliyə gəlmişdi. Belə ki, həmin vaxta qədər hakim komandada və Paşinyanın partiyasında təmsil olunan və bu vəzifəyə də məhz partiyanın sayəsində yiyələnən Marutyan müharibədəki məğlubiyyətdən dərhal sonra partiyadan istefa verdiyini bəyan etmişdi.

Son zamanlar isə hətta onun müxalif siyasi qüvvələrlə gizli əməkdaşlığa getdiyi, Robert Koçaryanla görüşdüyü barədə məlumatlar yayılmışdı. Belə görünür ki, artıq Paşinyan sabiq silahdaşının bu xəyanətlərinə dözmək fikrində deyil.

Son olaraq, parlamentin spikeri Alen Simonyanla Marutyan arasında gərginlik yaşanıb. İrəvan meri son çıxışında hakimiyyətin ona təzyiqlər etdiyini, tez-tez “yuxarılardan” zənglər gəldiyini bildirib, həmçinin parlament spikeri üçün 200 min dollarlıq bahalı xidməti “BMV” avtomobili alınmasını tənqid edərək, bunu inqilaba xəyanət kimi qiymətləndirib. Simonyan isə artıq “sabiq mer” adlandırdığı Marutyanı satqınlıqda və ikiüzlülükdə günahlandıraraq deyib ki, o, öz xəyanətinə və bacarıqsızlığına haqq qazandırmaq üçün istənilən yola əl atmağa hazırdır. Marutyanı “parazit” adlandıran spiker əlavə edib: “Onun şəhəri İrəvan deyil, Praqadır, onun komandası isə puldur”.

RUBRİKA.AZ

Facebook-da paylaş