«Həqiqət aşiqləri»nin növbəti İFTİRASI
Ümumiyyətlə təhsil haqqında KİV-lərdə gedən yazıları izlədikdə belə təəssürat yaranır ki, məlumatlar vahid mərkəzdən idarə olunur və məqsəd çox zaman müəyyən uğurlara imza atan təhsil xadimlərini və məktəbləri qaralamaq, nüfuzdan salmaqdır. Bunun kimlərin maraqlarına xidmət etdiyinin fərqinə varmadan baş verənlərin təhlükəli tendensiya olduğunu xüsusilə qeyd etmək istəyirik. Çünki millətin gələcəyi hesab olunan təhsil sistemini kor-koranə, qərəzli şəkildə qamçılamaq, hörmətdən salmaq cəmiyyətdə heç də müsbət aura formalaşdırmır.
Son günlər mediada M.Müşfiq adına 18 saylı tam orta məktəb və onun direktoru Rəna xanım haqqında yayımlanan məlumatları oxuyanda təəccübləndiyimiz qədər də təəssüfləndik. İlk baxışdan bu məktəbi və Rəna xanımı tanımasaydıq, bəlkə yazılanları həqiqət kimi qəbul edə bilərdik. Amma həmin ərazidə yaşadığımız üçün bizim öz doğmalarımız, yaxınlarımız bu məktəbdə təhsil alır, burada hökm sürən ab-havaya yaxından bələdik. Rəna xanımın pedaqoqluğuna və rəhbərlik qabiliyyətinə yaxından bələdik. Çəkinmədən məktəbin həm valideyni, həm də jurnalist kimi deyə bilərik ki, o məktəb direktoru vəzifəsində ən uğurlu təyinatlardan biridir. Məktəbdə təhsilalanların və təhsilverənlərin normal fəaliyyəti, eləcə də valideyn-məktəb münasibətlərinin ən üst səviyyədə təşkili üçün hər şey edilib. Di gəl ki, maraqlı dairələr nədənsə bütün bunları görməzdən gələrək heç kimin görmədiyi, duymadığı, ancaq bunlara məlum olan “həqiqətləri” tirajlayırlar. Guya məktəbdə əlifba bayramına, son zəngə kütləvi pul toplanması, özü də əməlli-başlı məbləğin yığılması barəsində səs-səsə verib yalanlar tirajlayırlar. Bir daha qeyd edirəm ki, övladlarımız, qonşularımız, tanıdıqlarımız bu məktəbdə, müxtəlif siniflərdə təhsil alırlar. Amma biz onların heç birindən , valideynlərindən pul toplanması barədə bir kəlmə də öyrənə bilmədik. Çünki belə bir hal yox idi. Bəs görəsən bu “həqiqət aşiqləri” məlumatları haradan alırlar? Bəlkə bizim tanımadığımız başqa bir 18 saylı məktəb və başqa bir Rəna xanım daha var?
Tənqid cəmiyyətin inkişafı üçün ən zəruri faktordur. Amma söhbət sağlam tənqiddən gedir. Qərəzli şəkildə, hansısa maraqlar naminə yalan məlumatları tirajlamaq, öz çirkin məqsədlərini reallaşdırmaq üçün iftira atmaq heç kimə, xüsusilə qələm əhlinə yaraşmır. Rəna xanım müəllim adının ucalığını, xalqına, dövlətinə sədaqət və sevgisini öz əməli ilə sübut edib. Bunu isə görməyə deyəsən hər kəsin gözü çatmır!
Xüsusu olaraq Rubrika.Az saytı üçün jurnalist, valideyn
Səbinə Cəlilova
Zaur Cəlilov
Facebook-da paylaş
