Hindistanın “Indian Narrative ” qəzeti İrəvan və Dehlinin müdafiə sahəsində əməkdaşlığı dərinləşdirmək planlarından yazıb.

RUBRİKA.AZ Bizimyol.info-ya istinadla xəbər verir ki, nəşrin məlumatına görə, Ermənistan tərəfinə Hindistan silahlarının tədarükü ilə yanaşı, gələcək əməkdaşlıq Hindistanın Misirə satmağa hazırlaşdığı silahların istehsalı üçün Ermənistanda birgə bazaların yaradılmasını nəzərdə tutur.

Nəşr yazıb ki, Ermənistan qonşu Azərbaycanla “irimiqyaslı münaqişəyə cəlb olunur”, bu münaqişəyə Hindistana düşmən olan başqa bir ölkə - Türkiyə hərbi dəstək verir və son illər Pakistanın da cəlb olunması ilə Azərbaycan-Türkiyə tərəfdaşlığı genişlənir.

Bundan əlavə, “İndian Narrative” yazır ki, Azərbaycanın təşviq etdiyi “Zəngəzur dəhlizi” adlandırılan nəqliyyat layihəsi (bu, Azərbaycanın qərb rayonlarını Ermənistan ərazisindən keçməklə Naxçıvan anklavı ilə birləşdirəcək) həyata keçirilərsə, bu, Hindistan üçün ciddi nəticələrə səbəb olacaqdır

“Axı “dəhliz”ə Ermənistan yox, Azərbaycan və Türkiyə nəzarət edirsə, o zaman sonuncu İranla sərhədi asanlıqla bağlaya bilər ki, bu da faktiki olaraq İranı Qafqazdan və Avropaya Qara dəniz marşrutlarından kəsir.

Bu multimodal marşrutlar Hindistan tərəfindən dəstəklənən Şimal-Cənub Beynəlxalq Nəqliyyat Dəhlizi üçün vacibdir. Digər tərəfdən dəhliz Türkiyənin Orta və Cənubi Asiyaya qurudan asan çıxışını təmin edəcək.

Hindistan Rusiyaya qarşı sanksiyaların tətbiqindən sonra daha da əhəmiyyət kəsb edən belə bir dəhlizin zorla tətbiq edilməsinin qarşısını almaq üçün əlindən gələni etməlidir. Bunun üçün hərbi cəhətdən güclü Ermənistan lazımdır və o, qonşularını təhdid etmədən özünü müdafiə edə bilməlidir",- deyə nəşr ermənipərəst mövqeyini ortaya qoyub.

Xatırladaq ki, bu günlərdə Ermənistan naziri Suren Papikyanın başçılıq etdiyi Ermənistan nümayəndə heyəti ikitərəfli hərbi və hərbi-texniki əməkdaşlığın genişləndirilməsini müzakirə etmək üçün Hindistana səfər edib.

Erməni nazir hindistanlı həmkarı Rajnath Singh ilə görüşlərdən əlavə, DefExpo 2022 müdafiə sərgisini ziyarət edib və Asiyada bu qəbildən olan ən böyük tədbirin eksponatları ilə tanış olub.

RUBRİKA.AZ

Facebook-da paylaş