Bir neçə gün öncə Dövlət Gömrük Komitəsi (DGK) “Əqli mülkiyyət hüquqlarının təminatı və piratçılığa qarşı mübarizə haqqında” qanuna əsaslanaraq gömrük ərazisinə gətirilən pirat və ya kontrafakt malların buraxılışını dayandırmaq hüququna malik olduğunu bəyan edib.

Yəni, qurum Çindən və digər ölkələrdən daxil olan, istehlakçılar arasında "brend mallar" kimi tanınan, əslində isə pirat və kontrafakt olan mallara qarşı yumşaq bir münasibət sərgiləmişdi.
Azərbaycan İnternet Forumunun prezidenti Osman Gündüz bildirir ki, DGK artıq bu məsələyə sərt münasibət sərgiləməyə başlayıb. Onun sözlərinə görə, artıq bu cür malların ölkə ərazisinə gətirilməsinin qadağan edildiyi bildirilir: “Karqolara belə malları daşımamaq haqqında göstəriş verilib. Karqolar da müştərilərinə bu haqda məlumatlar göndəriblər. Yəni, Çindən mal daşıyan sahibkarlar artıq hansısa brendin adından, loqosundan, hansısa ticarət nişanından və s. istifadə edərək mal gətirə bilməz”.

Bunun hansı nəticələri ola bilər?

Ekspert bildirir ki, indiki halda Çindən ölkəyə daxil olan, həmçinin karqoların hazırda gətirdiyi malların böyük əksəriyyəti "brend"dir, yəni kontrafaktdir. Onun sözlərinə görə, uzun illərdir bunun üzərində nəhəng bir biznes şəbəkəsi qurulub: “Bu zəncir halqasında Çindən bu malları daşıyan, topdan, pərakəndə satan, servisini təşkil edən, anbar xidməti göstərən, pərakəndə satış bazarları və ticarət mağazaları icarəyə verən, on minlərlə işçiləri işə cəlb edən və s. minlərlə sahibkarlıq subyektləri var. Alıcılar, istehlakçılar da uzun illərdi bu şəbəkə üzərindən alış-veriş edirlər. Hazırda anbarlarında, mağazalarında böyük həcmdə bu cür mallar olan sahibkarlar var. İndi bu sahibkarların, ümumiyyətlə bu şəbəkənin taleyi necə olacaq?”

O.Gündüz sual edir ki, daxili istehsalın olmadığı indiki şəraitdə bu cür sərt yanaşmanın nəticələri öncədən hesablanıbmı. “Həm də uzun illər oturuşmuş bu infrastruktur hesabına büdcəyə daxil olan vəsaitləri indi kim ödəyəcək, gömrük daxilolmaları əvvəlki səviyyədə qalacaqmı? Hazırda ölkədə mövcud olan, az sayda insanların daxil olduğu həqiqi brend mağazalarının büdcəyə ödədikləri vəsait indiki səviyyədə olacaqmı?

Görəsən DGK-da bu məsələlərlə bağlı ağlabatan bir həllər, proqnozlar varmı?

Ümumiyyətlə bütün bu addımlar ölkədə qiymət artımına təsir etməyəcəkmi”, - ekspert suallarını davam etdirir.

O.Gündüz vurğulayır ki, DGK-nın da qeyd etdiyi kimi, əqli mülkiyyət hüquqlarının obyekti olan mallardan qanunsuz istifadə mövcud normalara görə inzibati və cinayət məsuliyyəti yaradır. “Amma bunun məhz indiki vəziyyətdə, bu formada tətbiqinin faydası və ziyanını öncədən analiz etmək, təhlillər aparmaq, yol xəritəsi hazırlamaq, sahibkarları, həmçinin istehlakçıları və bütün şəbəkəni buna hazırlamaq daha doğru olardı”, - Osman Gündüz vurğulayıb.(azfakt.com)
Rubrika.Az

Facebook-da paylaş