İsveçə qələbə üçün gəlmişdik.

Bunu "Qarabağ"ın baş məşqçisi Qurban Qurbanov Avropa Liqasında İsveçin "Elfsborq" komandasına qarşı keçirdikləri oyundan sonra mətbuat konfransında deyib.

O, məğlub olduqları görüş barədə danışıb:

“Yaxşı müdafiə olunan komandaya qarşı mübarizə aparırdıq. Təəssüf ki, məğlub olduq. İsveçə qələbə üçün gəlmişdik. Oyunçularım sona qədər mübarizə apardılar. Lakin futbol səhvlərin üzərində qurulan bir oyundur. Ani diqqətsizlik səbəbindən qapımızda qol gördük.

Hər bir halda futbolçularıma təşəkkür edirəm. Onlar bu il çox əziyyət çəkdilər. Cari il uğursuz nəticələrimiz olsa da, irəlidəki görüşlərə baxacağıq. Daha da böyümək üçün. Bizim üçün bu ilki Avropa Liqasının oyunları böyük təcrübə oldu. Rəqibi qələbə münasibəti ilə təbrik edirəm”.

Təcrübəli mütəxəssis Ağdam təmsilçisinin cari mövsüm qitənin ikinci dərəcəli klub turnirindəki çıxışlarına da toxunub:

"Avroliqada 6 oyundan 5-də məğlub olduq. Məncə, bu məsələnin üzərində çox dayanmağa ehtiyac yoxdur. Pozitiv şəkildə irəlidəki oyunlara baxmalıyıq. Əgər Avropa Liqasının əsas mərhələsinə vəsiqə qazana bilməsəydik, bunu uğursuzluq hesab etmək olardı. Əslində, dediyim bu hal da baş verə bilər. Futbolda elə bir qanun yoxdur ki, hər il eyni səviyyədə çıxış edəsən. Düzdür, biz əlimizdən gələni edirik. Lakin bəzən görürsən ki, futbolçuların yorğun halları olur. Azarkeşlərin hisslərini başa düşürəm. Amma bildirmək istəyirəm ki, biz hər oyuna qələbə üçün çıxırıq. Amma bəzən işlər bizim istədiyimiz kimi getmir. Bu gün futbol elə bir səviyyəyə çatıb ki, hər bir komandanın eniş yaşamaq şansı var. Bəzən baxırıq ki, böyük futbol ölkələrinin klubları uğursuz çıxışları ilə diqqət çəkirlər".

Q.Qurbanov "qış transfer pəncərəsi"ndə heyətə yeni oyunçular cəlb etməyə çalışacaqlarını bildirib:

“Hər il komandaya yeni futbolçular cəlb etmək istəyirik. Ancaq bu o demək deyil ki, əlimizdəki oyunçuları göndərməyi düşünürük. Yeni futbolçu axtarışındayıq. Transfer dönəmində bir neçə yenilik etmək istəyirik. Bu da gedişatdan asılıdır. Hazırda müdafiədə problemlər yaşayırıq. Bildiyiniz kimi, Bəhlul Mustafazadə və Kevin Medina zədəli olduğu üçün Mateus Silvaya müdafiənin mərkəzində şans vermişdik. Açığı desəm, onun oyunundan çox razı qaldım. Amma bu qarşılaşmada da, hansısa oyunçumuz zədələnsəydi, meydana buraxa biləcəyimiz başqa mərkəz müdafiəçisi yox idi".

Qeyd edək ki, UEFA Avropa Liqasının Liqa mərhələsinin VI turunda “Qarabağ” səfərdə "Elfsborq"a 0:1 hesabı ilə uduzub.(report.az)

Rubrika.az

Facebook-da paylaş