Ölkədə tibb işçiləri Üzeyir bəyin “O olmasın, bu olsun” komediyasındakı vəziyyətə oxşar mənzərə ilə qarşılaşıblar. Onlar iki yol arasında qalıblar -yəni başlarına gələn müsibətin haradan qaynaqlandığını bilmirlər.

Bəlkə də indi bir qoçu Əsgər lazımdır ki, həkimlərə çıxıb desin – məşədi, 50 manat ver, Rüstəm bəyin düz başının vurum. Yaxud da bir başqa demaqoq təklif eləsin ki, 25 manat ver onu qəzetimdə biabır edim. Ancaq bunların heç biri mümkün deyil. Çünki tibb işçiləri başlarına gələn zülmün səbəbkarını səhv salıblar.
Problemin hardan qaynağlandığının əslini bilmirlər. Yəni burada “qızın iki adaxlısı”ndan biri - əsl günahkar tapılıb!
Uzun sözün kəsəsi, Azərbaycanda həkimlərin alacağı bonusları düz iki aydır ki, gecikir. Tibb işçiləri isə problemin TƏBİB-dən qaynaqlandığını düşünüblər. Onlara elə gəlib ki, problemi yaradan öz rəhbər qurumlardır.
Vəziyyətə aydınlıq gətirmək üçün redaksiyamız tərəfindən aparılan araşdırma zamanı məlum olub ki, bonusların yubanması heç də TƏBİB-lə əlaqəli deyilmiş. Çünki həkimlərə köçürülən bonuslar, yəni bu maliyyə sözügedən qurumun aktivində olmur. O cümlədən TƏBİB bu məsələdən irəli gələn problemlərlə bağlı öz üzərinə düşən öhdəçiliyi tam yerinə yetirib.
Araşdırma zamanı dəqiqləşdirmişik ki, bonusların iki aydır gecikməsi səbəbi tam Maliyyə Nazirliyinin günahıdır. İlin-günün bu vaxtında Maliyyə Nazirliyi həkimlərin bonuslarını iki aydır ödəmir. Bunun səbəbi də nazirlik tərəfindən izah olunmur.
Yeni maliyyə naziri Sahil Babayevin məsələdən nə dərəcədə məlumatlı olub-olmadığı bəlli deyil. Hər halda, nazir bonusların ödənməsinin yubanmasından sözsüz ki,xəbərsiz olmaz.
Əslində, Sahil Babayev yeni maliyyə naziri kimi bu sahədə belə bir problemlə gündəmə gəlməyi yaxşı hal deyil. . Onsuz da əmək və əhalinin sosial müdafiəsi naziri vəzifəsində olarkən, S.Babayev barəsində kifayət qədər şikayət, narazılıq var idi.
Ona görə də maliyyə naziri postunda reputasiyasını yaxşılaşdırmaq fürsəti yaranıb. Ancaq göründüyü kimi, Babayev həkimlərin bonuslarını gecikdirməklə gündəmdə gəlməkdədir.
Tibb işçiləri hazırda ciddi bir ehtiyacla gözləməkdədirlər ki, onların bonusları nə zaman köçəcək. Həkimlər haqqlı olaraq şikayətlənirlər ki, büdcədə hər hansı problem olmadığı halda, Maliyyə Nazirliyi nə üçün iki aydır belə bir çətinlik yaradıb?!
Onlar sual edirlər ki, qonşu ölkələrdə müharibə gedir, amma heç birində maliyyə ilə bağlı qulağa hər hansı neqativ xəbərlər çatmır, Azərbaycanda isə sabitlikdir, di gəl, həkimlər özlərini cəbhə xəttində hiss edirlər. Ümidvarıq ki, Sahil Babayevin nazirliyi bu problemin səbəbinə aydınlıq gətirəcək.

Nicat