BƏƏ hökumətinin nazirləri və yüksək vəzifəli şəxsləri Azərbaycanla Hərtərəfli İqtisadi Tərəfdaşlıq Sazişinin (CEPA) imzalanmasını alqışlayaraq, bu sənədi bütün dünyada inteqrasiya olunmuş iqtisadi tərəfdaşlar şəbəkəsinin yaradılması istiqamətində irəliyə doğru atılmış daha bir strateji addım hesab ediblər.

Xarici ticarət naziri Tani bin Əhməd Əl Zeyudi qeyd edib ki, Azərbaycan BƏƏ-nin Qafqaz regionunda əsas tərəfdaşıdır. Onun sözlərinə görə, 2024-cü ildə ikitərəfli qeyri-neft ticarəti 36,2 % artaraq 2,24 milyard ABŞ dolları təşkil edib.

BƏƏ Mərkəzi Bankının rəhbəri Xalid Məhəmməd Balama bildirib ki, saziş maliyyə sabitliyinin möhkəmləndirilməsi, bank əməkdaşlığının inkişafı və iki ölkə arasında fintex həllərinin təşviqi üçün mühüm alət olacaq.

Gömrük və Sərhəd Mühafizəsinin Baş direktoru vəzifəsini icra edən Əhməd Abdullah bin Lahec Əl Fəlasi vurğulayıb ki, CEPA gömrük prosedurlarını sadələşdirməyə və ikitərəfli təchizat zəncirlərini gücləndirməyə kömək edəcək.

Energetika və infrastruktur naziri Suheyl bin Məhəmməd Əl Mazrui bərpa olunan enerji, o cümlədən günəş, külək və su enerjisi sahəsində birgə layihələrin həyata keçirilməsi üçün sazişin əhəmiyyətini qeyd edib.

İqtisadiyyat naziri Abdullah bin Tuk Əl Marri CEPA-nın ikitərəfli ticarəti artırmaq, gömrük maneələrini azaltmaq və Azərbaycan biznesinin Afrika, Asiya və Avropaya çıxışını asanlaşdırmaq potensialına diqqət çəkib.

İnvestisiya naziri Məhəmməd Həssən Əl Suveydi öz növbəsində qeyd edib ki, BƏƏ artıq 1 milyard ABŞ dollarından çox investisiya ilə ərəb ölkələri arasında Azərbaycana ən böyük sərmayə yatıran ölkədir. Onun fikrincə, CEPA logistika, enerji, sənaye və infrastruktur sahələrində əməkdaşlıq üçün yeni imkanlar açacaq.

Xatırladaq ki, iyulun 9-da Əbu-Dabidə Azərbaycan Prezidenti İlham Əliyev və BƏƏ Prezidenti Şeyx Məhəmməd bin Zayed Əl Nəhyanın iştirakı ilə Hərtərəfli İqtisadi Tərəfdaşlıq Sazişi (CEPA) imzalanıb.(report.az)

RUBRİKA.AZ

Facebook-da paylaş