Azərbaycanda novruzəlilər hələ də var. İntəhası, onlar Novruzəli kimi yoxsul və acından yuxudan günorta oyanan deyil. Milyonçu novruzəlilər bu gün ölkədə meydan sulayır. Onlardan biri də tikinti maqnatı İsfəndiyar Axundovdur. Şərurdan olan İsfəndiyar Axundov çoban olduğunu gizlətmir. Mirzə Cəlil sağ olsaydı, milyonçu şərurlu çobana bir hekayə həsr edərdi. Məsələ bundadır ki, özünü savadsız, məktəbi axıra qədər oxumayan biri kimi göstərən, "Mən oturmuşam, çoban. Amma alimlər işləyir, pullar da gəlir” deyən Şərurlu İsfəndiyar əslində, bir çox qalmaqallı işlərdə adı keçən tikinti oliqarxıdır. Onun adı daha nələrdə hallanmır ki - mənzil fırıldağı, Binəqədi rayon Məhkəməsində gedən işi və sair. Hazırda Şərurlu İsfəndiyar Cinayət Məcəlləsinin böhtan və təhqir maddələri ilə ittiham olunur. Binəqədi Rayon Məhkəməsində İsfəndiyar Axundov barəsində 40-a yaxın məhkəmə işi var. Belə də çoban olarmı? Deməli, Novruzəli kimi saf biri deyil. O, təpədən-dırnağa çirkabın, qanunsuzluqların içindədir.
Məsələn, vəkil Asim Abbasov bildirib ki, "Şərur MTK" vətəndaşlardan evləri ucuz alaraq ikiqat bahasına satıb:
"Hamı düşünür ki, İsfəndiyar Axundov xeyriyyə işi ilə məşğuldur. Lakin o, vətəndaşdan evi, məsələn, 50 min manata alıbsa, 100 min manata da satıb".
Göründüyü kimi, İ. Axundov özü haqda saxta ictimai rəy yaradıb. Özünü bisavad, çoban kimi göstərir, amma həm camaata kələk gəlir, həm də alimləri aşağılayır ki, onlar işləyir, özü oturub pul verir. Bütün bunların bu həddə gəlib çatmasında heç də Şərurlu İsfəndiyarın xüsusi biznes bacarığı dayanmır. Bu cəmiyyətdə heç kəs inanmaz ki, çoban və təhsilsiz bir adam bu ağılla milyonçuya çevrilsin. Axundovla bağlı əsl həqiqət budur ki, onun arxasında uzun müddət Prezident Administrasiyasının keçmiş rəhbəri, indi dövlətə xəyanət maddəsi ilə barəsində ev dustaqlığı qərarı çıxarılmış Ramiz Mehdiyev dayanıb. Bəli, məhz Mehdiyevin dəstəyi sayəsində Axundov Bakıda onlarla bina tikib və toxunulmaz olub. Onun hər hansı istedadı və biznesmen qabiliyyəti olmayıb ki, bu dərəcədə varlansın. Ramiz Mehdiyevin dəstəyi sayəsində Şərurlu İsfəndiyar bu yerə gəlib çatıb. İndi isə bəlli olur ki, dövlətə xəyanətdə ittiham olunan şəxsin komandasında İsfəndiyar Axundov da var imiş. Beləliklə, mehdiyevçilər bir-bir üzə çıxmağa başlayır. Onun bu xəyanət şəbəkəsində, çevriliş planında, iştirakı haqda bir söz demək çətindir, bu istintaqın işidir, lakin Axundovun Mehdiyevin adamı olduğu da sirr deyil. İsfəndiyar Axundovun adı gələndə hər kəs onun Prezident Administrasiyasının keçmiş rəhbəri Ramiz Mehdiyevin adamı olduğunu, ona arxalanıb dövləti və qanunları saya salmadığını, onun özü və şirkətilə bağlı məhkəmələrin hamısını bu səbəbdən “udduğunu” deyirlər.
İndi isə bu əlaqələrin hansı səviyyədə olduğu, Mehdiyevin tikinti sektorunda nə kimi ona şərait yaratdığı araşdırılmalıdır....

Nicat Mahmudov

Facebook-da paylaş