Dollarlaşma səviyyəsinin 80 faizdən çox olduğu ölkədə təbii ki, manatın məzənnəsinin dəyişməsinə yanaşma heç də birmənalı deyil. Amma əsas odur ki, dolları və manatı olanlar doğru məlumat verməyə çalışsın. Sözsüz ki, bu, asan deyil. Ekspertlərin qiymətləndirməsindən asılı olmayan çoxlu faktorlar var.

Bu haqda iqtisadçı alim Vüqar Bayramov yazıb. Ekspert bildirib ki, xüsusən də bir sıra kommersiya banklarının spekulyativ davranışları valyuta bazarında son 2 ayda diqqəti daha qabarıq cəlb edib:

“Amma fevralın əvvəlində manat möhkəmlənməyə başlayanda bunun bir neçə günlük deyil, bir müddət davam edəcəyi gözlənilən idi. Fevralın əvvəlində fevral və martın I yarısında dollara tələbin azalacağını proqnozlaşdırmışdım. O zaman mənə müraciət edən xeyli vətəndaşımız və hətta jurnalist dostlarımızdan da öz dollarlarını 1,90 kursu ilə manata çevirənlər oldu. Dolların ucuzulaşmasının uzun müddətli olub-olmamasından asılı olmayaraq, təbii ki, yüksək kursla dolları manata çevirmək və aşağı məzənnə ilə yenidən xarici valyuta almaq gəlir deməkdir. Baha kursla dolları satıb, ucuz kursla yenidən alanda bəzi banklar deyil, vətəndaşlarımız da qazanır və bu da ən ideal variantdır”.

V.Bayramov bildirib ki, bazar məzənnəsi alınanadək kurs fərqli istiqamətlərdə dəyişəcək:

“Kursun necə olmasında manat bazası və eləcə də bazar təklifi həlledici olacaq. Bütövlükdə isə iyun, avqust və dekabr aylarında dollara tələb yenidən artacaq. Xüsusən də dekabrda tələbin daha çox artacağı gözlənilir. Neftin qiyməti, idxal, Dövlət Neft Fondundan transferlər növbəti dövrdə manatın məzənnəsinə birbaşa təsir göstərəcək. Neftin qiyməti hətta orta müddətli dövrdə manatın məzənnəsi üçün çox vacibdir”.

Ekspert qeyd edib ki, bir sıra kommersiya banklarının təsir imkanlarının çoxaldığını nəzərə alaraq, qısa müddətli dövr üçün məzənnədəki dəyişikliyi proqnozlaşdırmaq olar:

“Məzənnənin necə dəyişəcəyini nəyə əsasən müəyyənləşdirmək olar ki, valyutası olanlar itirməsin? Əgər dolların manata rəsmi kursu və ya banklardakı alış-satış məzənnəsi yüksəlirsə, deməli, növbəti həftələrdə xarici valyutaların kursunun artacağı daha çox gözləniləndir. O zaman dollar almaq olar. Və o artım 2-3 həftədən sonra dolların yenidən ucuzlaşması ilə müşahidə ediləcəksə, deməli, növbəti həftələrdə manatın möhkəmlənməsi etimalı yüksəkdir. Bu halda valyutanı dəyişmək olar. Artıq bazar özü 2-3 həftəlik və ya 1 aylıq mesajı verə bilir. Bütün hallarda, pul valyuta səbəti formasında saxlanılması daha məqsədə uyğundur: 60 (və ya 50) faiz dollar, 20 faiz avro və 20 (və ya 30) faiz manat. Bu, sığortalanmış valyuta səbətidir. Valyuta bazarındakı tendensiyaların dəyişməsindən asılı olaraq bu faizlər dəyişə bilər. Deməli, fərqli məlumatlar fonunda öz qərarlarınız da yığımlarınızı valyuta risklərindən qoruya bilər”

Rubrika.az

Facebook-da paylaş