Bu gün ölkədə beşinci bələdiyyə seçkiləri keçirilir. Mərkəzi Seçki Komissiyasının (MSK) məlumatına görə, bu seçkidə dörd milyon doqquz yüz yetmiş iki min üz yüz əlli altı seçici səsvermə hüququndan istifadə etmək imkanındadır.

Rubrika.Az modern.az-a istiandla bildirir ki, seçki zamanı daha çox diqqət çəkən məqam prosesə müdaxilə ilə bağlıdır. Xüsusilə rayon İcra hakimiyyətlərinin seçki prosesinə müdaxiləsi nəinki ictimaiyyət tərəfindən birmənalı qarşılanmır, eləcə də, hüquqi prosedurlara görə bu, qanunla qadağandır.

Maraqlıdır, seçki prosesinə müdaxilə edən rayon İcra Hakimiyyətlərini hansı cəza növü gözləyir?

Təcrübədə belə hallar olubmu?

“Konstitusiya Araşdırmaları”Fondunun prezidenti, tanınmış hüquqşünas Əliməmməd Nuriyev Modern.az-a bildirib ki, belə hallar qanunla qadağandır:

“Bu, qanunla qadağandır”

“Seçki Məcəlləsinin çoxsaylı maddələri ki, seçki prosesinə müdaxiləni qadağan edir. Həm yerli icra hakimiyyətinin, həm müşahidəçilərin, həm namizədlərin, həm də komissiya üzvlərinin seçkiyə qeyri-qanuni müdaxilə etməsi qanunla qadağandır. Xüsusilə rayon İcra Hakimiyyətlərinin seçki məsələləri ilə bağlı hansısa işləri görmək hüququ yoxdur. Yalnız seçki məntəqələrində yerləşdirmənin texniki tərəfini aradan qaldıra bilərlər. Bundan başqa seçkinin hazırlanması, səslərin hesablanması kimi mühüm məqamlar seçki administrasiyasının müstəsna səlahiyyətinə aid olan məsələdir”.

“2 ilə qədər azadlıqdan məhrum edilə bilər”

Əliməmməd Nuriyevin sözlərinə görə, seçki prosesinə müdaxilə edən İcra Hakimiyyətləri cəzasız qalmır:

“Cinayət Məcəlləsində bülletenlərin saxtalaşadırılması prosesinə müdaxilə, seçki administrasiyasının vəzifəli şəxslərinə qeyri-qanuni göstərişlərin verilməsi, yaxud da, namizədə hədə qorxu gəlinməsi, komissiya üzvlərinin hər hansı fəaliyyətinə müdaxilə qadağandır. Bu cür müdaxiləyə görə, Cinayət Məcəlləsində 2 ilə qədər azadlıqdan məhrumetmə cəzası var. Bu, İcra Hakimiyyətlərinin vəzifəli şəxslərinə də aiddir. İcra Hakimiyyətlərinin seçki hakimiyyəti üzərində hər hansı səlahiyyəti yoxdur”.

“Vəzifəsini itirən icra başçısı olub”

Həmçinin, hüquqşünas seçki prosinə müdaxilə edən İcra Hakimiyyətlərinin olduğunu istisna etməyib:

“Bu barədə müxtəlif zamanlarda bəzi fikirlər səsləndirilib. İstər imzaların toplanması, istərsə də namizədlərin qeydə alınmasına müdaxilələrin olması barədə deyilib. Bir çox hallarda da bu məlumatlar birbaşa öz təsdiqini tapmayıb. Səhv etmirəmsə, ya 2000-ci illərin əvvəli, ya da, 1990-cı illərin sonu olardı. Hətta İcra Hakimiyyəti vəzifəsindən azad edilənlər də olub. Ancaq son illərdə rayon İcra Hakimiyyətlərinin seçkilərə müdaxiləsi ilə bağlı hər hansı fikirləri xatırlamıram”.

Rubrika.Az

Facebook-da paylaş