Ötən həftənin sonundan Bakı bazarlarında xiyar bahalaşıb. Hazırda Zirə xiyarının 1 kiloqramı 5-6 manata, rayonlardan, eləcə də İran və Gürcüstandan gətirilən xiyarın kiloqramı isə 2 manat 70 qəpik-4 manat arası satılır.

Virtualaz.org saytının əməkdaşının Bakı bazarlarında apardığı müşahidələrə görə, xiyarın qiyməti bir-iki gün içərisində artırılıb. Buna görə də, bazarlarda məhsul qıtlığı yaranıb.

Paytaxtın “8-ci kilometr” massivində yerləşən, xalq arasında “Vasmoy bazarı” kimi tanınan bazarda xiyarın qiyməti 2 manat 70 qəpik-3 manat arasında dəyişir. Halbuki cəmi bir neçə gün əvvəl bu məhsul 1 manat 50 qəpik-2 manat, tikanlı növü isə 80 qəpik- 1 manata satılıb.

Bazarda meyvə-tərəvəz satışı ilə məşğul olan Nizam Məmmədov bildirib ki, ötən həftənin şənbə günü topdansatış mərkəzindən xiyar ala bilməyib: “Bu qiymətə xiyar alıb üstünə 20-30 qəpik qoyub satmaq sərfəli deyil”. Satıcının fikrincə, istixanalar bazara məhsul verməsini dayandırıb, güman ki, bayramərəfəsini gözləyirlər.

◀▶
Sevda adlı satıcı isə xiyarı 4 manatdan təklif edir. Deyir ki, Şəmkirdən gəlib, Şəmkir xiyarı isə məşhurdur. Baxmayaraq ki, istixana şəraitində yetişdirilib. Xiyarın sortunu Hollandiyadan alıblar, keyfiyyətinə görə açıq sahədə yetişdirilən yerli sortlardan geri qalmır.

Satıcılar deyiblər ki, xiyar müxtəlif salatların tərkibinə vurulur, buna görə də təlabat artıb. Amma istənilən halda alıcı var, əvvəl 1-2 kiloqram alanlar indi 2-3 dənə ilə kifayətlənirlər.

Qeyd edək ki, xiyardan fərqli olaraq, pomidorun bahalaşması müşahidə edilməyib. Hazırda bazarlarda pomidorun qiyməti 1 manat 50 qəpikdən 3 manatadəkdir.

Paytaxtın digər bazarlarında da qiymətlər fərqli deyil.

◀▶
Kənd təsərrüfatı üzrə ekspert Nicat Nəsirli virtualaz.org-a bildirib ki, xiyarın bahalaşmasına təkcə bayram, yaxud mövsümü amillər təsir etməyib. Rusiya builki mövsümdə xiyara olan təlabatı daxili istehsalla təmin edib, pomidor isə əksinə sistem, mövqeyini bərkidib. Buna görə də istixanalar pomidora üstünlük veriblər, yəni pomidor xiyarı sıxışdırıb: “Doğrudur, hər il bayram ərəfəsi az da olsa bahalaşma müşahidə edilir. Amma konkret xiyara gəldikdə, buna müxtəlif amillər təsir edib”,-ekspert söyləyib. Nəsirlinin sözlərinə görə, ölkədə hava şəraitinə görə açıq sahədə tərəvəzçilik 2 ay 15 gün davam edir. Getdikcə, yəni ildən-ilə açıq sahələrdə tərəvəz yetişdirilməsi azalır, bütün dünya, eləcə də Azərbaycan qapalı sistemə keçir: “Hazırda Azərbaycanda 3500 hektar sahədə istixana şəraitində tərəvəz yetişdirilir. Bunun yarısı pomidor, yarısı xiyarın payına düşürdü. İstixanaların əksəriyyəti məhsulunu Rusiya bazarına çıxarırdı, indi pomidor xiyarı üstələyib”.

◀▶
Digər tərəfdən, məhsul oktyabr, noyabr aylarında yığılır. “Birinci yığım oktyabr-noyabr aylarında olur, üstəlik birinci yığımda məhsuldarlıq yüksək olmur, ikinci, üçüncü yığımda isə əksinə yüksək olur. İkinci yığım yanvarın 5-dən sonraya təsadüf edəcək, bazara yeni məhsul çıxarılacaq. Təbii ki, qiymət də aşağı düşəcək”.

Kənd Təsərrüfatı Nazirliyinin tabeliyində olan “Aqrar Tədarük və Təchizat” ASC-nin mətbuat katibi Mayis Musayev isə bildirib ki, nazirliyin təşkilatçılığı ilə paytaxtın 5 rayonunda təşkil edilən bayramqabağı yarmarkalarda xiyar 2 manat-2 manat 50 qəpiyə satışa çıxarılıb.

“Bakının Yasamal, Nərimanov, Suraxanı, Abşeron, Binəqədi rayonlarında yarmarkalar təşkil olunub, ayın 30-dək davam edəcək. Yarmarkalara 200-dən çox fermer 70 çeşiddə məhsul çıxarıb. Qiymətlərə müdaxilə edilməsə də, fermerlərlə danışılıb ki, təyin edilən qiymət bazarlardakı qiymətlərdən baha ola bilməz. Buna görə də əksinə 20-30 faiz ucuzluqdur. Hətta tikanlı xiyar növü 80 qəpik-1 manat arasında təklif edilib. Bayramqabağı yarmarkalara alverçilər buraxılmayıb, yəni məhsul ikinci, üçüncü əl dəyişmədiyindən qiymətlər bazarlara nisbətən fərqlidir”,-M.Musayev belə deyib.

Rubrika.Az

Facebook-da paylaş