Türk dünyasının turizm paytaxtı ŞAMAXI — Minnətdarlıq müraciətləri...
Cənab Prezidentin dəfələrlə səfərlər etdiyi Şamaxıda təkcə rayon mərkəzinin abadlaşmasına deyil, bütün yaşayış məntəqələrinin inkişafına xüsusi diqqət yetirilir. Təsadüfi deyil ki, zəngin ehtiyatlara malik olan bu qədim diyar 2023-cü il Türk dünyasının turizm paytaxtı elan olunub. Təkcə bu fakt rayona göstərilən diqqət və qayğının təzahürüdür. Həmsöhbət olduğumuz rayon sakinləri Şamaxının turizm potensialına verilən bu böyük qiyməti minnətdarlıq hissi ilə qarşılayır, qədim diyarın müasir inkişaf dinamikasını yüksək qiymətləndirirlər.
Şamaxıda son illərdə müşahidə olunan tərəqqi, əhalinin həyat səviyyəsinin yüksəlməsi və görülən abadlıq-quruculuq işləri rayon rəhbərliyinin gərgin əməyinin nəticəsidir. İcra başçısı Tahir müəllim demək olar ki, bütün yaşayış məntəqələrində sakinlərlə görüşlər keçirir. Özü də bu görüşlər protokol xatirinə, rəsmiyyət üçün deyil, xalqın səsini eşitmək, problemlərinə yaxın olmaq üçün keçirilir. Hər bir görüşdən sonra həllini gözləyən problemlər dərhal aradan qaldırılır, kəndlərin, qəsəbələrin sosial sifarişləri həll edilir.
Onu da qeyd etmək lazımdır ki, belə görüşlər təkcə rayon rəhbərliyi tərəfindən deyil, Şamaxıdan millət vəkili seçilən Tamam xanım tərəfindən də mütəmadi olaraq keçirilir. Rayon sakinləri ilə söhbətimizdə onlar Tamam xanımın əsl xalq adamı olduğunu, şamaxılıların problemi ilə yaxından maraqlandığını qeyd etdilər. “Tamam xanım şamaxılılar üçün artıq doğma bir insana çevrilib, hətta xeyrimizdə, şərimizdə də yaxından iştirak edir. Onun Şamaxıya olan bağlılığı, millət vəkili statusundan istifadə edərək gördüyü böyük işlər hər birimizin ürəyini dağa döndərir. Bax əsl xalq adamı, millət vəkili məhz belə olmalıdır”- deyir bizimlə söhbətləşən Akif müəllim.
Həmsöhbət olduğumuz Böyük Xınıslı kənd sakinləri də icra başçısı Tahir müəllimin, millət vəkili Tamam xanımın onlara göstərdiyi diqqət və qayğıdan ürək dolusu danışdılar. Kənd sakinləri son zamanlar Böyük Xınıslıda görülən abadlıq işlərini, qaldırdıqları problemlərin qısa zamanda operativ həll olunduğunu bildirirlər. “İllərdir ki, kəndimizdə həllini gözləyən problemlər var idi. İcra başçısı Tahir müəllimə bunlar barəsində məlumat verdikdən sonra çox şey dəyişildi. Tamam xanım da bizim kəndin problemləri ilə yaxından maraqlanıb. Böyük Xınıslıda görülən böyük işlərə görə Tahir müəllimə, Tamam xanıma minnətdarıq“.
Rayonun Sabirli kəndinin illərdir həllini tapmayan yol problemi də qısa zamanda aradan qaldırılıb. Keçilməz vəziyyətdə olan kənd yolları asfaltlaşdırılıb, kənd sakinlərinin istifadəsinə verilib. Sabirli camaatı deyir ki, yol mədəniyyətin, inkişafın başlanğıcıdır. Biz illərdir ki, bundan məhrum idik, amma rayon rəhbərliyi bizi bu çətinlikdən də xilas etdi.
Şamaxıda müşahidə olunan inkişaf dinamikası deməyə əsas verir ki, bu qədim diyar Türk dünyasının turizm paytaxtı olma missiyasını da uğurla yerinə yetirəcək. Dahilər yurdu, gözəlliklər diyarı Şamaxımız Azərbaycanımızın uğurlu inkişaf simvolu kimi bütün dünyaya səs salacaq. Bu qədim diyarı qarış-qarış gözəlləşdirən zəhmətkeş insanlara, o cümlədən şəxsən Cənab Prezident İlham Əliyevə, Birinci Vitse-prezident Mehriban xanım Əliyevaya daha böyük uğurlar arzulayırıq !
Nicat Mahmudov
Rubrika.Az
Facebook-da paylaş
